 |
|
|
Pasalip
Ti CSC Naggibus; Ad-adu Nga Ay-ayam Nagutugot
Abra Today
News
(09 Jul 00 - 15 Jul 00)
|
|
|
|
|
|
|
|
|
GINUTUGOT
da Gobernador Ma. Zita Valera ken Congressman Vicsyd Valera iti
Council of Personnel Officers (CPO) nga ad-adu koma pay nga ay-ayam
ti maisagana a pagsasalipan dagiti empleado ti gobierno tapno ad-adu
ti partisipasion.
Daytoy a panawagan dagiti ama ken ina ti probinsia ti impadanon ni
Acting Provincial Administrator Diosdado Cariño kadagiti opisial ti
CPO ken kadagiti amin a dimmar-ay iti naaaramid a pannakaiyawat ti
tropeo ken cash prize kadagiti nangabak iti kalkalpas a Basketball
Tournament nga inlungalong ti CPO babaen iti kooperasion ti Civil
Service Commission-Abra Field Office nga idauluan ni Director
Rogelio Mercado, ken ti gobierno probinsial.
Nupay kasta, nagyamanan dagiti dua a kangatuan nga opisial ti
probinsia dagiti amin a nangilungalong iti pasalip, kasta met dagiti
nakipaset ken dagiti nangidonar kadagiti premio dagiti nagabak.
Isu met laeng a panagyaman ti impeksa ni bise gobernador Luis "Chito"
Bersamin Jr., ken ni Josie Flores a presidente ti Council of
Personnel Officers ti Abra.
Segun ken ni Nards Andanan, Personnel Officer ti gobierno probinsial,
inyalat ti PNP team ti kinakampeon a nakaiyawatan ti dakkel a tropeo
ken lima ribu a pisos nga indonar ni Congressman Valera. 1st
runner-up met ti team ti kapitolio. Naipaayan dagitoy iti
tropeo ken tallo ribu a pisos nga indonar ni gobernador Ching.
Immawat met iti tropeo ken 2 ribu a pisos kas premio ti team ti
LGU-Bangued kas 2nd runner-up. Ti premio ti indonar ni bise
gobernador Bersamin. Imbolsa met ti Bureau of Fire Protection
ti sangaribu a pisos ken tropeo kas gunggona iti panangiyalatna kas
3rd runner up.
Kabayatanna, kuna ni Andanan a napadayawan ti Dept. of Agrarian
Reform ken ti Abra State Institute of Sciences and Technology (ASIST)
kas Most Disciplined Teams iti kalkalpas a paay-ayam. Ti
tropeo ken sangaribu a pisos nga inawat ti tunggal maysa kadakuada
ti imparangkap da mayor Rogelio Elveña, presidente ti Mayor's
League ti Abra, ken ni Celia Narciso, maysa a supplier.
Naaramid ti seremonia ti pammadayaw ken pannakaiyawat dagiti premio
iti sanguanan ti kapitolio itay bigat, kalpasan ti pannakaibayog ti
bandera, pannakakanta ti nailian a samiweng, ken panagsapata dagiti
empleado.
|
|
|
|
|
|
|
|
|
|
|
|
|
|
 |
|
|
